​​​FLIGHTGEAR.CH

THE BIG SWING – una sctela per mia dimenticaa

​

Quescta sctela, pianificada e faia da una iniziativa privada, l’è sctaia finida in otobar dal 2025 per regordà l’otantesim anniversari d’un episòdi capitaa sü l’altro versant dala val, in primavera del 1945.

Al punt precis dove s’è sccontraa l’aeroplano al sa trova circa 600 metar püsee a süd e l’è mia fàcil da ragiünc, per quescto che al monument l’è sctai metüü lì, sü’l teren metü  a discposizion dal Consòrzi Sctrada Foresctal d’Arbéd.

​

Guardando la sagòma dell’aeroplano inciduda sü la sctèla, sa ved la posizion aprosimativa del vecc camp dai detriti che, per via da l’escplosion e dala forma dal teren, i s’eran scpargiüü sü  centenaia da metar quadraa.

​

Par fortüna, tücc i mèmbri de l’equipag i han pudüü salvàs saltando giò col paracadute e, ‘na volta sü la tèra, nisün l’è resctaa ferii.

​

Quesc chi l’è domà un cürt riassunto di eventi: ‘na ricostruzion püsee detaiada la sarà prest disponibil sü ‘n sit web dedicad.

​

Solenzara, Corsiga – mercoldì 7 febrar 1945.

​

A mancavan meno da tri mes a la fin dala guèra in Europa quand, la matina presct, un bombardier medio bimotor North American B-25J-1-NC Mitchell l’è partii per la so ültima mision. L’aeroplano, nümer da serie 43-4067, battezzad “The Big Swing”, cun numer tatic “76”, l’era un veteran da guèra: fabricaa nel  1944 e già cun al so atif sesanta mision.

​

Al bombardier al partegniva al 448th Bomb Squadron, 321st Bomb Group, dentar al 57th Bomb Wing dala  12th Air Force di USAAF.

​

A bord gh’era ses oman, tücc giuvin, tra i 21 e i 34 an. Al so obietiv l’era al viadott dala ferovia di Lavìs, in Trentin. L’azion la faseva part da l’operazion “Strangle”, una grand campagna per taià i riforniment tedescc e spezzà una volta per tücc la resisctenza sü la “Ligna Gotica” in Italia, colpendo l’infrasctrutüra logisctica che la pasava sü dal Pass dal Brenner.